عندما عرفت بموقع قناة الأهلى وضعتها فى قائمة ال فيفوريت ع الريسيفر
عشان أشوف الواجهة بتاعتها كل ما اقلب ف القنوات ، طبعا إحنا من زمااااااان و إحنا مستنيينها ، كل واحد ممكن يكون ليه تصور معين للقناة و شكلها و برامجها ، أنا هكتب تصورى دا و كل واحد ممكن يعمل كدا ، و يكون دا مفيد جدا للقائمين عليها ،يعرفوا جماهير الأهلى عايزة إيه ، لأن القناة دا موجهة ليهم بس ، صح
فيه كذا نقطة عاوز أتكلم فيهم عن القناة ، و هى شروط عشان القناة تنجح و ماتبقاش قناة و السلام زى القنوات الرياضية اللى فاتحة دلوقتى :
- لازم اللى يمسك إدارة القناة و طقم العمل يكونوا محترفين و مبدعين فى مجالهم . يعنى ما يبقاش مدير القناة واحد أهلاوى و رياضى و خلاص ، و على رأى المثل إدى العيش لخبازه . طقم العمل من مخرجين و مذيعين برضه يكونوا على درجة عالية من الإحتراف و يا ريت نشوف وجوه شابة و أفكار جريئة و جديدة على الإعلام الرياضى
- ميزانية القناة لازم تبقى محترمة تكفى إنتاج برامج فيها جودة و إبهار ، و ما يبخلوش عليها بالفلوس ، لأن القناة دى لو نجحت هتبقى من أهم موارد النادى ، حتى لو كانت مجانية فكفاية الإعلانات ، دى ممكن تجيب دهب .
-لازم القناة ما تبقاش متحيزة للأهلى ف الصح والغلط ، بمعنى ما تعملش زى الجرايد الحكومية مخلية الدنيا بمبى بمبى
، لأ تبقى القناة أول ناقد للفريق لو فيه غلط ، وهدفها هو تصحيح الغلط دا ، يعنى زى ما أخوك مثلا جوة بيتكم يقولك إنت غلطان ف كذا و كذا وكذا ، و الصح تعمل كذا و كذا . طبعا هيفيدك رأيه جدا .
- لااااااااااااااااااازم القناة تنقل نبض الجماهير ، تعبر عن الجماهير ، تعمل برامج هدفها الأول و الأخير نقل رأيى و رأيك فى كل ما يتعلق بالفريق ، ممكن برامج تغطى جماهير المدرجات و تشجيعهم و دخلاتهم و كل دا . فيه برنامج إسمه هايد بارك ف قناة دريم الرياضية ، فكرته إته بيخللى الجماهير تتكلم و يسيبولها الفرصة ، لدرجة الواحد ممكن يقعد نص ساعة ، البرنامج دا فكرته حلوة قوى ، و مش عيب إنه يتعمل زيه مثلا .
-لازم القناة تعمل برامج بأفكار جديدة عن نجوم الفريق ، أفكار ماتكونش إتعملت قبل كدا . و فيه فكرة جامدة إنهم يجيبوا بعض نجوم الفريق لتقديم برامج ، يعنى مثلا بركات ممكن يعمل برنامج يستضيف فيه نجوم الفريق و نجوم الأهلى السابقين و بخفة دمه هيبقى برنامج ر هيييب . أبو تريكة مثلا ممكن يعمل برنامج دينى ف القناة ، مش بهرج والله .
-الإستديوهات التحليلية ممكن القناة تجيب ناس من المعروفين زى الشيخ طه إسماعيل مثلا ، بس يا ريت تطلع وجوه جديدة ، و يكون التحليل بأسلوب جديد .
و أخيرا لازم القائمين على القناة يعرفوا إنهم بيمثوا النادى الأهلى صاحب أكبر شعبية ف الوطن العربى و أفريقيا ، و معاهم ملايين الجماهير الأهلاوية اللى بتعشق الأهلى ، و أعتقد إن مجلس الإدارة مش هيبخل عليهم فى الفلوس .
يبقى ما لهومش حجة ، كل أسباب النجاح موجودة ، عشان القناة تنجح نجاح مبهر ، و تبقى من أكبر القنوات الرياضية العربية 
الرئيسية 
